Përparim Rama, arkitekt me famë botërore, ka marrë drejtimin e Prishtinës, pasi kandidoi nën në siglën e LDK-së. Jo vetëm nga mbiemri, ai pikëtakohet me Edi Ramën nga fakti se u kthye nga Europa për t’u përfshirë në politikën e vendit të tij, gjithashtu duke marrë një bashki, atë kryeqytetase, pra si Rama ynë në vitin 2000, e ç’është më kryesorja, që të dy vijnë nga profesione të sferës artistiko-estetike, Rama i Kosovës, edhe funksionale. Rama piktor në Shqipëri, fillimisht në Tiranë, efektoi te ngjyrat që morri kryeqyteti, më tej dhe në shumë aspekte estetike, pra diktuar nga shija artistike. Nga ana tjetër, pikërisht për këtë arsye ka pritshmëri të madhe nga Rama i Kosovës, ndër të rrallat raste kur në kaosin urban të qyteteve shqiptare vjen në krye një arkitekt.
“Luftën e kam me kaosin urban”, tha Rama i Prishtinës në një prononcim pas fitores.
Ai ka lindur në Prishtinë me 20 janar të vitit 1976 dhe në moshën 16-vjeçare është shpërngulur në Britaninë e Madhe si refugjat duke kërkuar azil.
Atje ai studio për arkitekturë, fushë në të cilën arriti të bëhet i njohur. Media të rëndësishme botërore si Bloomberg, BBC apo CNN i kanë kushtuar vëmendje punës dhe jetës së tij.
Aktiviteti i tij profesional ka qenë në Britaninë e Madhe, Shtetet e Bashkuara të Amerikës, Çeki si dhe në Shqipëri.
Në vitin 2012, ai përfaqësoi për herë të parë Kosovën në Bienalen e Venecias me veprën e emërtuar “Punuesi i filigranit”.
Qytetet shqiptare qeverisen ndër vite nga njerëz me profesione të ndryshme, deri dhe mjekë, por janë “sëmurur” rëndë nga pikëpamja arkitektonike dhe urbane. Ky i Prishtinës është ndër të rrallat raste që do qeveriset nga një arkitekt. Pritshmëria është e madhe në këtë rast, për të parë se si mund ta diktojë shijen apo konceptin e tij arkitektonik apo urban një njeriu te qyteti që menaxhon. /tesheshi.com/
