Reshjet e shiut ditët e fundit, si dhe bora në male, kanë relaksuar qeverinë shqiptare të përfshirë nën ankthin e një krize të rëndë energje, jo vetëm për çmimet e larta, siç thoshte, por dhe për mungesën e saj në tregun global, siç paralajmëronte me pezm.
Ministrja e Infrastrukturës dhe Energjisë, Belinda Balluku deklaroi në mbledhjen e Komitetit të Energjisë se situata tashmë e përmisuar e se për këtë arsye nuk do të ketë as rritje çmimi dhe as ndërprerje të energjisë elektrike.
“Nuk ka vend për panik, por kemi zgjedhur të informojmë qytetarët për transparencë, pasi ka patur një interes shumë të fortë nga publiku.
Ne kemi folur edhe për krizën energjetike botërore, flasim për mungesë së energjisë elektrike edhe në botë.
Ne e kemi garantuar që nga momenti i parë që nuk do të ketë as mungesë të energjisë elektrike dhe as rritje të çmimeve për familjet shqiptare dhe as për biznesin e vogël”, tha gruaja përgjegjëse për energjinë.
“Ka pasur një përmirësim ditët e fundit”, shtoi ajo, duke theksuar se uji në basenin e Fierzës do të kursehet.
“Ka patur një rritje të liqenit të Fierzës, duke qenë se ne kemi vendosur të mos prodhohet në Fierzë për disa kohë për të grumbulluar të gjitha ujërat, me shpresë që do të kemi edhe në ditët në vazhdim një prurje të re të motit të lagët”, tha Balluku. /tesheshi.com/
