Riciklimi, nga Saranda në Tokio: a e dini nga ç’janë bërë medaljet olimpike?

Ekspozita e hapur në shëtitoren e Sarandës, promovuar dhe nga kryebashkiaku Gurma, tregon se ç’mund të bëjë pasioni njerëzor, edhe inteligjenca gjithashtu, duke rikapitalizuar artistikisht mbetje të riciklueshme.

Ndaj, një lajm i rrallë i ngjashëm vjen nga Tokio, nga Lojrat Olimpike, aty, ku dhe njëherë kanë dalë në pah virtytet e veçanta të japonezëve.

Kështu, ata i kanë bëtë medaljet e Lojërave Olimpike dhe Paraolimpike në Tokio në 2021 për herë të parë nga metalet e ricikluara, konfirmuan organizatorët e eventit të madh sportiv.

Si pjesë e projektit “Drejt një të ardhmeje inovative për të gjithë”, nga 1 prill 2017 deri më 31 mars 2019, banorët e Japonisë dhuruan pajisje të vogla elektronike dhe telefona inteligjentë, të cilët më pas u ricikluan, dhe metalet e çmuar që përmbaheshin në to u shkrinë dhe u përdorën për të krijuar medalje olimpike që tashmë po fitohen nga atletët më të mirë në botë.

Kështu, i gjithë kombi i ndërgjegjshëm për mjedisin mori pjesë në krijimin e medaljeve që do të mbahen me krenari nga shumë atletë.

Japonezët mblodhën gati 79 mijë tonë pajisje të vogla elektronike dhe pothuajse 6,21 milion telefona celularë të vjetër, në të cilat ishin “fshehur” 32 kilogramë ar, 3,500 kilogramë argjend dhe 2,200 kilogramë bronz.

Përndryshe, e gjitha kjo do të përfundonte në plehra. Në vend të kësaj, gati 5,000 medalje Olimpike dhe Paraolimpike u bënë nga materiali i mbledhur. /sarandacity.al /