Risia: në çdo shkollë, një këndi i sigurisë rrugore

Edukimi përmes argëtimit i fëmijëve për të qenë qytetarë të përgjegjshëm në rrugë e drejtues mjeti më të vetëdijshëm kur të rriten, është një ndër fushatat që po kryen Drejtoria e Përgjithshme e Shërbimit të Transportit Rrugor në shkollat e vendit.

Kryeministri Edi Rama ndau sot pamje të veprimtarisë që po zhvillohet për edukimin e fëmijëve me rregullat e lëvizjes në rrugë në disa shkolla të vendit.

“Shëtisim me Këndin e Sigurisë Rrugore në çdo shkollë. Edukojmë përmes argëtimit fëmijët për të qenë qytetarë të përgjegjshëm në rrugë e drejtues mjeti më të vetëdijshëm kur të rriten”, u shpreh kryeministri.

Në fillim të muajit janar Drejtoria e Përgjithshme e Shërbimit të Transportit Rrugor si dhe Drejtoria e Përgjithshme e Arsimit Parauniversitar nënshkruan një marrëveshje bashkëpunimi për realizimin e projekteve dhe aktiviteteve të ndryshme për zhvillimin dhe edukimin e fëmijëve me rregullat bazë të sjelljes qytetare e sigurisë rrugore për grupmoshën 6-14 vjeç.

Marrëveshja po ashtu parashikon kryerjen e fushatave sensibilizuese mbi sjelljen në rrugë për ndërgjegjësim publik të përdoruesve të rrugës, si edhe ndikimin për mësimin e edukatës rrugore në institucionet arsimore.

Veprimtaritë kryesore kanë në fokus njohjen e manualeve edukative, ndërgjegjësimin mbi rreziqet në rrugë, praktikat e sjelljeve të përgjegjshme, zgjedhjet e sigurta në situata të improvizuara rrugore për veten e të tjerët, si dhe njohjen e tabelave sinjalizuese.

Në vitin 2021, sipas INSTAT-it, numërohen 1.376 aksidente rrugore nga 1.234 aksidente të ndodhura në vitin 2020, duke u rritur me 11,5 %. Krahasuar me vitin 2019, numri i aksidenteve është ulur 8,1 %.

Në vitin 2021, aksidentet rrugore, në 15,3 % të rasteve, kanë ndodhur si pasojë e sjelljes së këmbësorit. Gjatë kësaj periudhe, numri i aksidenteve sipas sjelljes së këmbësorit është rritur 17,3 %, krahasuar me të njëjtën periudhë të një viti më parë. /atsh/