Rrëfimi: kur fati i Sherif Merdanit në burg varej nga morali i një sarandioti

Ditë më parë, do ikte nga kjo botë Kurt Kola, një ndër figurat simbol të persekutimit komunist.

Në media po publikohen copëza të rrëfimeve të tij, pjesë nga libri “Në Shqipërinë burg”, ku ndër të tjera kujton momentin e arrestimit të Sherif Merdanit. Te ky i fundit veçon një riarrestim në kushte burgu, ku shpresonte se do i shpëtonte një ridënimi, duke besuar te sinqeriteti i një dëshmitari të atyshëm mes të dënuarve. Ky i fundit ishte nga Saranda, por i ndjeri Kurt Kola nuk ia thotë emrin.

Sarandioti vihet në një dilemë morale përballë një kërkese që i bën Merdani, që edhe ky ndërroi jetë para pak kohësh.

Dhe, nëse sarandioti zgjodhi të vërtetën apo gënjeshtrën brenda dilemës morale, mësohet nga rrëfimi i mëposhtëm i Kurt Kolës, i cili e quan atë “rrezikzi”.

“Tani, i riarrestuar në kampin e terrorit, ku jeta e njeriut është gjëja më e pavlerë dhe ridënimi ose shtimi i viteve të burgut praktik e preferuar e regjimit, Sherifi kërkon të thërritet në hetuesi për të dëshmuar në mbrojtje të tij, një të burgosur nga Saranda, i cili kishte rënë në burg qysh në moshën 20 vjeç. Ky kishte bërë 20 vjet burg dhe, tani, që ishte 40 vjeç i kishin mbetur ende edhe vetëm 40 ditë për të dalë nga ferri…

Ky rrezikzi, që gjatë 20 viteve s’i kishte ardhur as nënë e as baba, as i kishin çuar një letër apo telegram, ky i vdekur i harruar, që po gdhinte net pa gjumë për të parë një ditë pa polic e ushtar nga pas, e sheh veten, çuditërisht, përballë hetuesit kriminel: “Të mbroj Sherifin duke gënjyer e të marr 10 vjet dënim, apo të them të vërtetën e të shkoj në shtëpi?”. Në këtë mëdyshje, aq sa e lehtë ishte zgjedhja, po aq i rëndonte në karakter rrezikziut…

Hetuesi, i ngazëlluar mendonte: Me një gurë po vras dy zogjtë…

– Sherif, pse më ke thirrur mua këtu? – e pyet burri nga Saranda.

– Grigor Xarxo më akuzon se kam folur kundër pushtetit filan ditë, që ishim bashkë në tarracën e apelit. Të kam thirrur ta përgënjeshtrosh si shpifje.

– A e di se kam bërë 20 vjet burg, kam 40 ditë për të mbaruar dhe ti më thërret të më implikosh e të më rrezikosh në një dënim tjetër? Ti do që të them të vërtetën, apo të gënjej?

– Unë, të kërkova që të thuash të vërtetën, – i thotë Sherifi.

– E vërteta është siç ka thënë Grigori!

Grigor Xarxo, ishte një spiun që deklaronte publikisht: Unë jam gati të shkel mbi eshtrat tuaja (të burgosurve), veç të dal nga burgu! Ishe më i sigurt të flisje kundër në sy të operativit ose komisarit, sesa në sy të Grigorit.

Sherifi u ridënua me dhjetë vjet burg, ndërsa sarandjoti plotësoi 20 vjetët dhe iku në shtëpi”. /sarandacity.al/