Rruga e re nën Lëkurës: testi urban i administratës “Gurma”

Një ditë më parë, Kryebashkiaku Gurma do ofronte pamje të kantierit të rrugës së re mbi Turizëm – Çukë, paralel me këtë të fundit, një lloj tuneli me pallate anash me shumë pak fragmente vizive detare.

Rruga e re, ajo nga centrali elektrik e deri te Kanali i Çukës, do ketë funksionin e një Baypass-i, duke bërë që të jetë një alternativë, sidomos në verë, e segmentit të poshtëm të mbingarkuar me trafik.

Ndërkohë, pritet do jetë dhe një rrugë panoramike. Por kjo e fundit varet nga Bashkia. Pra, nëse do jetë e tillë apo do katandiset dhe ajo në një tunel pallatesh, siç Rruga 5, krejt e rëndomtë, pa pikë shije.

Me rrugën e re poshtë Lëkurësit, Bashkia ka rastin të tregojë se e kaluara në ndërtime nuk kthehet më, pra ashtu siç është ndërtuar deri më sot, psikopatisht në çdo aspekt.

Në statusin e tij, Kryebashkiaku parathoshte interesin për ndërtime aty, një gjë krejt e natyrshme e krejt e pritshme.

Por si do jenë ato, në stil dhe vendosje?

Është fjala për një zhvillim të ri urban në faqen e një kodre, e cila ofron një nga pamjet më aspak simpatike, madje dhe më problematike të Sarandës.

Turizëm – Çukë është një zonë mishmash, pa status të përcaktuar urban: zonë hoteliere, zonë banimi? Rezidenciale jo e jo.

Kështu që rehabilitimi i asaj çfarë është bërë keq poshtë, ka shans të bëhet lart. Pra të rruga e re.

Këtë presim të na e thotë i pari i punëve të qytetit, Gurma. Rruga është thjesht lek dhe çështje cilësie. Ndërsa çdo gjë tjetër krah saj, është çështje vizioni, fantazie, mençurie.

Nuk dihet nëse Bashkia do i ketë këto të trija në atë çfarë do vijë me rrugën dhe pas rrugës. /sararandacity.al/