Së shpejti në Greqi, gjithçka në celular: edhe ID, edhe patenta, edhe…

Ministri i qeverisjes dixhitale në Greqi, Kyriakos Pierrakakis, në një intervistë për gazetën Ta Nea ka folur për hapat e ardhshëm dhe lehtësitë që vijnë nga kjo ministri që ai drejton.

Siç tha ai, shfrytëzimi i mëtejshëm i portofolit në celularët tanë është planifikuar me shtimin e identitetit personal. Gradualisht në portofol do të shtohen patentë shoferi dhe libreza shëndetësore.

“Identifikimi, identiteti ynë në thelb, duhet të kalojë në celularët tanë. Ky është tashmë rasti për shumicën, madje edhe për transfertat e parave. Dhe kjo ndodh me siguri më të madhe se ajo që po ndodhte në situatën që po përpiqemi të kapërcejmë sot, të burokracisë së tepruar dhe përdorimit të vazhdueshëm të certifikatave në letër”.

Ministri nënvizoi se së afërmi “do të mund të themi se identiteti ynë do të jetë transferuar plotësisht në celularin tonë”.

Rritja e transaksioneve elektronike

Siç theksoi ministri, Greqia pa një rritje shumë të madhe të transaksioneve elektronike pasi nga 8.8 milionë transaksione në vitin 2018 u kalua në 34 milionë në vitin 2019.

“Vitin e kaluar kemi kaluar 94 milionë dhe këtë vit pritet të regjistrojmë më shumë se 300 milionë”, shtoi ai.

“Kjo rritje është eksponenciale dhe vjen falë shërbimeve elektronike që kemi zbatuar në mjedisin e gov.gr, por edhe reagimit të qytetarëve, të cilët i kanë integruar në përditshmërinë e tyre”, shtoi Pierrakakis.

Njëkohësisht, ministri Pierrrakakis theksoi se në tremujorin e parë të 2022 të gjithë fëmijët do të marrin librezën elektronike shëndetësore, ndërsa “në janar fillojmë administrimin 656 500 nënshkrime dixhitale për profesionistët, kontabilistët, avokatët, noterët, nëpunësit civilë, për qytetarët që do ta kërkojnë”.

Hapat e mëtejshëm në fushën e Drejtësisë

“Shumica e proceseve të drejtësisë greke kanë potencial të madh përshpejtimi, nëpërmjet dixhitalizimit dhe thjeshtimeve,” tha Kyriakos Pierrakakis.

“Që në fillim jemi në bashkëpunim të ngushtë me ministrin kompetent Kostas Tsiaras dhe ekipin e tij, për të përdorur sa më shumë mjete dixhitale në këtë drejtim. Pandemia ka përshpejtuar tashmë shumë prej veprimeve tona: lëshimin elektronik të çertifikatave gjyqësore, marrjen elektronike të vendimeve gjyqësore, depozitimin elektronik të padive”.

Gjithashtu, pak ditë më parë u njoftua shërbimi për informimin në kohë reale, në lidhje me ecurinë e tabelave në Gjykata, fillimisht për Gjykatën e Shkallës së Parë Athinë, diçka që sjell kursime të mëdha në kohë për avokatët dhe palët, sipas asaj që sqaroi Kyriakos Pierrakakis. /sarandacity.al/