Në Gjykatën e Tiranës u zhvillua këtë të enjte seancën e parë të shqyrtimit të padisë për shpifje të Fredi Belerit ndaj drejtorit të Arkivit të Shtetit, Ardit Bido.
Ky i fundit prej javësh është angazhuar në denincimin e një projekti nacionalist grek me “komandant ekzekutues” Fredi Belerin, me synimin që anë të censusit shifra e popullsisë minoritare në Jug e Breg të shkojë 20 përqind, pas së cilës shteti shqiptar detyrohet të vendosë tabela dy gjuhëshe edhe atje ku nuk ka minoritet.
Në seancën ku palët u ftuan për pajtim, Beleri nuk ka pranuar të pajtohet. Ndërsa Bido ka pranuar pajtim, por pa u tërhequr nga deklaratat e tij publike, të konsideruara si shpifje nga Beleri. Për këtë shkak, gjykata caktoi seancën e radhës në janar.
Në padinë e tij, Beleri pretendon se Bido ka deklaruar fakte të pavërteta kur ka përfshirë emrin e tij në masakrën e Peshkëpisë dhe pjesëmarrjen në grupime ultranacionaliste greke.
Jashtë gjykatës, Bido tha se në deklarimet e tij i referohej fakteve të pohuara nga vetë autoritete greke. /sarandacity.al/
