Seanca për Çamërinë, media greke: E pabesueshme!

“Sfidë e pabesueshme ndaj Greqisë, brenda Kuvendit të Shqipërisë”, e niset kështu një raportim në median greke, lidhur me një seancë përkujtuese në kuadër të pragpërvjetorit të tragjedisë çame.

“Pasditen e së hënës u zhvillua një aktivitet kushtuar kujtimit të viktimave të ‘gjenocidit’ çam nga grekët. Aktiviteti u organizua nga partia ekstremiste dhe antigreke PDIU, e cila pretendon se përfaqëson qytetarët shqiptarë me origjinë çame, e cila promovon sistematikisht axhendën e Ankarasë në vend”, shkruan Protothema.

“Ngjarja provokuese ka ndodhur me tolerimin e kryesisë së parlamentit dhe qeverisë Rama, e cila herë pas here “përkëdhel” veshët e nacionalistëve për arsye elektorale”, vijon kjo media.

“Në faqen zyrtare të Kuvendit të Shqipërisë thuhet në mënyrë provokative: ‘Sot, 78-vjetori i gjenocidit të shqiptarëve të Çamërisë nga grekët, 27 qershori u njoh nga parlamenti në vitin 1994 si ditë gjenocidi dhe kujtimi, në prani të çamëve patriotë.

Përpara një pankarte ku shkruhej ‘78 vjet gjenocid’, fëmijë të vegjël dhe të rinj recituan poezi çlirimtare për atdheun duke kultivuar antihelenizmin. Deri më tani nuk ka një reagim zyrtar nga Athina, për atë që në mënyrë provokative ndodhi në parlamentin shqiptar”.

Më pas, Protothema ofron versionin zyrtar të shtetit grek mbi atë që ndodhi me çamët.

“Çamë ishin një racë shqiptare në rajonin e Epirit, të cilët ishin përjashtuar nga shkëmbimi i detyruar me Turqinë pas katastrofës së Azisë së Vogël dhe Traktatit të Lozanës në vitin 1923. Gjatë Luftës së Dytë Botërore, ata bashkëpunuan ngushtë me forcat e Boshtit, duke i trajtuar si ‘çlirimtare’ forcat pushtuese italiane dhe gjermane, me të cilat bashkëpunuan me to duke formuar njësi të armatosura që vepronin kundër popullsisë greke”. /sarandacity.al/