Në një analizë dhe shifrore nga Monitor në lidhje me sezonin turistik të lënë pas, veçohet fakti se nordikët, deri para pak vitesh dominantë në plazhet tona, sidomos në Sarandë, munguan dhe këtë vit
“Nordikët, të cilët për disa vite u vendosën në Golem dhe Sarandë, si pjesë e turizmit të organizuar munguan edhe këtë vit në brigjet shqiptare, njësoj si në vitin 2020.
Ndërkohë interesi për Shqipërinë i polakëve dhe çekëve është rritur, njëlloj si ukrainasit apo bjellorusët”, shkruan revista analitike ekonomike në fjalë, duke cituar Rrahman Kasajn nga Unioni Turistik Shqiptar.
“Bie në sy tregu polak që në numra ka qenë mirë. Po kështu edhe tregu çek i cili ka pasur ritme të kënaqshme.
Tregu rus ishte i pranishëm në numra të vegjël dhe ky ishte një sinjal i mirë ky në tërësi, ndërkohë që Bjellorusia dhe Ukraina ishin shumë mirë në shifra në vazhdim edhe të vitit të shkuar. Nordikët, sikurse e dini, nuk erdhën edhe këtë vit për shkak të pandemisë”, tha z.Kasa.
Por nga ana tjetër, është një tjetër kontigjent turistësh që iu rikthyen bregdetit shqiptar.
“Përveç turizmit të organizuar duket se këtë vit në Shqipëri u rikthyen edhe turistë nga vende të tjera që prej disa vitesh po e kthenin në traditë vizitën e tyre në verë. Bëhet fjalë për turistët europianë që vijnë me rezervime individuale dhe të pavarur”, shkruan Monitor, duke cituar më pas Zak Topuzin nga Shoqata e Hotelierëve.
“Turistët gjermanë, polakë, malazezë, italianë dhe nga nga SHBA rigjetën Shqipërinë si destinacion dhe numri i tyre po u afrohet shifrave të vitit 2019 me rreth 15-20% më pak. Rënien më të madhe (rreth 3 herë) e kanë pasur turistët nga Greqia, për shkak të bllokimit të lëvizjeve drejt kufirit shqiptar. Si përfundim, mund të themi se ka qenë një vit i suksesshëm përtej pritshmërive. Turizmi ndihmoi dhe sektorë të tjerë në rimëkëmbjen e tyre në këtë vit të vështirë”, tha z.Topuzi. /sarandacity.al/
