Shërbime të reja pa emrat e vjetër: ku janë “Kristo Kalivopulli” dhe “Stefan Mekshi” dhe pse Materniteti i ri s’u quajt “Vedat Beqi”?

Materniteti i ri dhe Urgjenca e re, nuk i kanë më emrat e vjetër të tyre, përkatësisht Kristo Kalivopulli dhe Stefan Mekshi.

Në rastin e parë, drejt ambienteve të reja u zhvendos vetëm busti i ish-mjekut të njohur. Por në godinën e re asgjëkundi në hyrje të saj nuk figuron emri i tij. Si dhe te Urgjenca gjithashtu. Në hyrje të tyre janë të shkruara vetëm ato çfarë përfaqësojnë si shërbime– Urgjenca dhe Maternitet.

Nuk dihet nëse kjo është thjesht një harresë apo vendim që këto dy shërbime spitalore të mos mbajnë më emrat e vjetër. Apo është lënë për një kohë tjetër vënia e tyre në fasadë.

Ndërkaq, për Maternitetin ka ekzistuar një kërkesë që t’i vihej një tjetër emër, ai i gjinekologut emblemë Vedat Beqi. Këtë e kërkoi bashkëshortja e tij me banim në SHBA. Por përgjigja që iu dha ish-kryebashkiakja Floriana Koka, ishte kjo:

Përgjigje kërkesës suaj për nderimin e emrit të Dr. Vedat Beqi                       

Drejtuar: Znj. Hasije Beqi, 119 Old Essex Road Manchester by the Sea Ma 01944, A M E R I K Ë

E nderuar zonja Hasije!

Ju përshëndes dhe ju komplimentoj për faktin që ju jetoni me Sarandën edhe duke jetuar në Amerikë. Vlerësoj pozitivitetin që gjeta në çdo rresht të letrës suaj, drejtuar mua, në cilësinë e Kryetares së Bashkisë dhe ju falenderoj për urimet e sinqerta e shpirtërore që gjeta në këtë letër.

Më lejoni të shprehem se nuk i heq asnjë presje karakterizimit që ju bëni për të ndjerin bashkëshortin tuaj, Vedat Beqi, mjekun e talentuar e të nderuar nga e gjithë Saranda.

Kontributet e tij të jashtëzakonshme dhe sakrificat e bëra në disa dekada, përbëjnë një histori suksesi, në emër dhe në në shërbim të përtëritjes së jetës.

Jam plotësisht dhe shpirtërisht me të njëjtin mendim që ju shprehni: që emri i Dr. Vedat Beqit nuk pranon pluhur harrese por meriton të shkruhet diku me gërma të mëdha.

Absolutisht bashkohem me konsideratën se gjurmët e tij si mjekt pasionant, si profesionist i mirë dhe si drejtues skrupuloz, janë pjesë e memorjes së këtij qyteti. Ato janë të pashlyeshme nga kujtesa e familjeve sarandiote dhe të lidhura me dekadat kur mjekësia plotësonte mungesën e aparaturave me dashurinë e mjekëve për profesionin dhe për njeriun, me përgjegjshmërinë e lartë për detyrën humane dhe profesionalizmin e tyre.

Nuk ka asnjë dyshim se Dr. Vedat Beqi ishte njeri prej tyre, ivlerësuar nga komuniteti po aq sa edhe nga rrethet shkencore të kohës, brenda e jashtë vendit. E gjitha kjo është një konsideratë e padiskutueshme dhe konstatoj me kënaqësi, e gjithëpranuar. Nga ana tjetër, më vjen keq për pamundësinë reale që institucioni i Shtëpisë së Lindjes në Sarandë, të mund të mbajë emrin e Dr. Vedat Beqit.

Kërkoj gjithë mirëkuptimin tuaj për ta pranuar njësoj si unë argumentin se vetëm në pikëpamje ndërtimore, ky institucion është i ri dhe është duke u ngritur si pjesë e korpusit spitalor të qytetit të Sarandës.

Në përmbajtje, në funksione dhe në çdo element tjetër që ai bart, është institucioni ekzistues, pa bërë përjashtim nga kjo as emërtimi që mban prej vitesh dhe i njohur zyrtarisht si ‘Shtëpia e Lindjes Kristo Kalivopulli’. 

Duke uruar çdo të mirë për Ju e familjen, ju falenderoj për mirëkuptimin”, përfundon përgjigja e ish-kryebashkiakes Floriana Koka. /sarandacity.al/