Publiku shqiptar duhet të presë dhe një muaj për të mësuar mbi fatin e presidentit me sjelljen më kontraverse në post-komunizëm, Ilir Meta.
Pasi dëgjoi palët në seancën e radhës, Gjykata Kushtetuese vendosi që ta japë verdiktin përfundimtar brenda 30 ditësh.
Njëra nga palët, përfaqësuesi i mazhorancës Taulant Balla, e cilësoi procesin ndaj Metës si “festë për demokracinë”.
“Të gjithë kemi detyrimin të ruajmë një heshtje institucionale, derisa gjykata, brenda afatit 30 ditor, vendimi i shoqëruar me arsyetimin përkatës.
I gjithë ky proces ka qenë shumë i mirë dhe i shëndetshëm kushtetues për cilësinë demokracisë në Shqipëri.
Unë mendoj që çdo deklaratë e imja apo e palëve të përfshira në proces nuk do t’i bënte mirë çuarjes deri në fund të një procesi që unë e quaj ‘festë për demokracinë’, u shpreh Taulant Balla.
Nga ana tjetër, përfaqësuesi ligjor i Metës, Bledar Dervishaj, paralajmëroi se eprori i tij mund ta çojë Kuvendin, atë që “përgatiti letrat” e shkarkimit, në Prokurori.
“Sot u mbyll seanca gjyqësore e iniciuar krejtësisht pa të drejtë nga Kuvendi i Shqipërisë. Për fat të keq u provua dhe sot se Kuvendi për qëllime politike depozitoi prova shkresore të manipuluar, vetëm e vetëm me qëllimin që të rrëzoheshin pretendimet e kreut të shtetit. Presidenti ka vendosur t’i drejtohet prokurorisë lidhur me këtë çështje”, tha Dervishaj.
Por kujtojmë: edhe nëse s’shkarkohet, Meta i ka ditët e numëruara në Presidencë, pasi në korrik i përfundon mandati. /tesheshi.com/
