Shqipëria ka korrur një fitore historike 2-0 ndaj Polonisë, pak ditë pasi barazoi me Çekinë në Pragë, duke iu afruar kështu një kualifikimi për Europianin e Gjermanisë pas një viti, hera e dytë kjo pas pjesëmarrjes në Francë 2016.
Me nga një gol në çdo pjesë, ku dalloi ai i Asanit me një goditje jashtë zone në diagonal, por dhe i dyti i Mirlind Dakut falë një mjeshtërie dribluese brenda zone e goditje precize në një pozicion të vështirë, Shqipëria ka përsëritur suksesin e mesviteve ’80-të ku me të njëjtin rezultat do mundte Belgjikën e madhe të atyre viteve. Po në ato kualifikuese Botërori, me Poloninë e epokës Boniek do barazonte 2-2 në Varshavë. E tani mposht Poloninë e Lewandowskit, fituesit të Topit të Artë, një ndër goleadorët më të mirë në botë.
Kështu, Shqipëria e brazilianit Silvinho po përjeton një ringritje me emra të rinj, me synimin për të përsëritur atë që ndodhi me De Biazin pak vite më parë.
Tashmë kuqezinjtë kryesojnë në grup, me Çekinë e Poloninë që vijnë pas tyre, të cilët janë dhe sfidantët kryesorë në rrugën drejt Gjermanisë. /tesheshi.com/
