Kombëtarja shqiptare e futbollit do shkojë për herë të dytë në një Europian, verën e ardhshme në Gjermani, duke e finalizuar këtë sukses në fakt me një ndeshje pa shkëlqim, atë me Moldavinë në Kishinjev, duke barazuar 1-1, duke e përfunduar madje ndeshjen në ankth nga frika e një humbjeje të mundshme, pasi fundi i ndeshjes, kur dhe u pësua goli, flisnin tërësisht për moldavët, të cilët e zhvendosën lojën e tyre te zona e kuqezinjve. Shqipëria kaloi në avantazh që në pjesën e parë, me një 11-metërsh të ekzekutuar nga Cikalleshi, por pothuajse me një varfëri në sulm gjatë gjithë ndeshjes, duke mos qenë fare ajo e fitoreve të njëpasnjëshme.
Tashmë, me këtë barazim Shqipëria e siguroi Europianin, që do të thotë se ndeshjet e mbetura, më e afërta me Ishujt Faroe mbas pak ditësh në Tiranë, do jenë thjesht miqësore.
Kështu, pas Francës në 2016-ën me De Biazin në drejtim, Shqipëria do jetë në Gjermani nën drejtimin e Sylvinhos.
Por duhet thënë se Franca u prek falë një fitoreje në tavolinë, 3-0 ndaj Serbisë, ndaj së cilës humbi 2-0 në Elbasan Arena, për shkak të një vendimi të UEFA-s pas ndërprerjes së ndeshjes në Beograd si pasojë e incidenteve nacionaliste në fushë kur një flamur i sajuar shqiptar i quajtur autoktonus u end mbi stadium. /sarandacity.al/
