Shuhet një antikomunist i thekur borshiot

Eshtë ndarë papritmas nga jeta, pa u dhënë arsye, gazetari nga Bregu, borshioti Nebil Çika.

Ai shquhej për antikomunizmin e tij, pasi vinte nga një familje e persekutuar, pasardhës i Nebil Çikës së viteve 30-të me Minervën e famshme, ku dhe bashkokohësi ynë i ndjerë tashmë themeloi Minervën e tij pas viteve 90-të.

Nebil Çika ishte në krye të të përndjekurve politikë vitet e fundit, ndërkohë që pas zhvillimeve të pazakonta në PD u pozicionua kundër Berishës.

Ai ishte ndër zërat unikë të gazetarisë antikomuniste, duke patur dhe prejardhje të pastër antikomuniste.

Nebil Çika ishte 58 vjeç dhe mjaft aktiv. Në lajmin e dhënë nga familjarët nuk jepen arsyet e ndërrimit jetë.

Në një dedikim nekrologjik për të ndjerin, ish-kryedemokrati Basha shkruan:

“Me hidhërim të thellë mora lajmin për largimin e parakohshëm nga jeta të njeriut të letrave, gazetarit dhe publicistit të njohur Nebil Çika.

I shpreh ngushëllimet e mia familjes së tij, djemve dhe bashkëshortes për këtë humbje të pazëvëndësueshme.

Nebilin do ta kujtojmë përherë si zotërinë e nderuar, pasardhës të një familjeje patriote dhe të persekutuar gjatë diktaturës, gazetarin që pasqyroi me vërtetësi kalvarin e persekutimit komunist dhe që deri ditën e fundit mbrojti me dinjitet besimin dhe idetë që nuk i ndërroi kurrë.

Shqipëria humbi sot një atdhetar të mirë, një antikomunist të pakompromistë dhe një njeri që çdo ditë të jetës ja kushtoi shkrimit me vërtetësi të historisë dhe realitetit politik.

 U prehtë në paqe!” /sarandacity.al/