Skena “lufte elektrike” te Rruga 3: a duhet në padi ndaj OSHE-së?

Për të dytën herë në pak ditë, zemra e Sarandës përjetoi flakëritjen e kabllove të korrentit, duke përcjellë frikë e ankth, si dhe pezmin e ndërprerjes së energjisë në pikun e sezonit. Një situatë të tillë, me defekte në këtë kohë e ikje dritash, nuk patur ndonjëherë vitet e kaluara. Shpjegimi jo nga OSHE-ja lokale por nga logjika e thjeshtë
njerëzore është se rrjeti nuk po mban dot mbingarkesën, në një lloj vape që kërkon pashmangshmërisht ndezje kondicioneri. Megjithatë, siç dhe kryebashkiaku Çaçci jua ka përcjellë ditë më parë drejtuesve lokalë të Elektrikut, kanë patur plot kohë për të punuar që kjo të mos ndodhë, duke bërë të gjitha parashikimet e mundshme për t’i dalë të keqes përpara. Nuk jemi në vitet ‘90 ku realitetet e reja vinin befasisht e të gjenin të papërgatitur; jemi në 2023, ku plot përvoja të mëparshme, si dhe studime e projeksione, të japin mundësi për mospasje të asnjë të papriture me energjinë, përveç rasteve të kataklizmove natyrore. Të tilla nuk po ka. Është ca vapë, por e tillë vape nuk është për herë të parë.

Gjithsesi, i takon OSHE-së që të japë një shpjegim publik se ç’po ndodh.

Nevoja për një padi

Rasti e do dhe një padi kolektive nga bizneset, të cilat duhet t’i kërkojnë OSHE-së dëmshpërblim për pasojën e sjellë në punën e tyre. Krijimi i precedentëve të tillë është i nevojshëm për një shkundje te ata që kanë një përgjegjësi jo të vogël kur është fjala për furnizimin e rregullt me energji.

Mosekzistimi i praktikave të tilla, me padi kolektive, ka çuar në një lloj moskokëçarje të shtetit ndaj biznesit, kur është fjala për dëmin që i pari i shkakton të dytit.

Ekzistimi i padive të tilla në botë, në shoqëri me vetëdije të lartë kolektive, ka çuar në shtet me institucione të përgjegjshme ndaj individit.

Nevoja dhe për hetim    

Një padi për dëmshpërblim duhet të çojë dhe në hetime mbi shkaqet e asaj që ka ndodhur apo po ndodh.

Për këtë rast janë shtuar pëshpëritjet për afera të dyshuara korruptive në OSHE, të cilat sjellin të tilla zhvillime negative, me kabllo që digjen në rrugë, siç në rastin e fundit te Rruga 3, skena që mund të bëjnë dhe xhiron e botës në epokën e një fshati global, duke cenuar rëndë imazhin e Sarandës.

Hetimi duhej të zbulojë nëse ajo që ka ndodhur ka qenë tej mundësive teknike të OSHE-së apo se ka ardhur për shkak të ndonjë abuzivizmi të mundshëm me detyrën.

Te ne Shqipëri, dihet tashmë se shumëçka ndodh përsëprapthi bie erra korrupsionin e abuzivizëm. Ndaj nuk është çudi që dhe në një zhvillim të tillë dëshpërues me energjinë në qytet të bie era e sëmundjes që po na mundon si shoqëri: vjedhim shtetin por dhe njëri-tjetrin, pacipësisht. Ndaj dhe ka dalë ajo thënia: S’jemi të varfër, por të vjedhur! /sarandacity.al/