Është shndërruar në tabiat të shëmtuar një lloj kinse nacionalizmi vulgar që shënjestron variantin greqisht të tabelave orientuese në zonat e minoritetit, pa llogaritur që është një kundërvënie ndaj shtetit. Sepse ato tabela, të pëlqejnë apo s’të pëlqejnë, kanë një referim ligjor, pra një referim te rregullat e shtetit.
Por dhe në rrafshin social, në një vend ku bashkejetesa është madje ndër të vetmit normalitete në anormalitetin e përgjithshëm, duar të tilla nga mendje të trazuara njollosin, edhe pse me bojë të bardhë, një dekor jetësor më pa probleme.
E sigurt, me ç’prova ofron realiteti, se nacionalisti i madh i këtij akti nuk është ai qytetari model, pra një atdhedashës. Duke mos qenë atdhedashës në terma praktikë, bëhet nacionalist në terma psiqikë.
Nga ana tjetër, shteti nuk duhet të tolerojë të tilla shfaqje. Së paku duke hequr njollën, së shumti duke hetuar dorën që njollos. /sarandacity.al/
