Ish-ministri Saimir Tahiri përfundon aty ku aq shumë i trembej: në qeli.
Apeli i Gjykatës Kundër Korrupsionit dhe Krimit të Organizuar la në fuqi vendimin e shkallës së Parë të Krimeve të Rënda, me 5 vite burg, por që nga gjykimi i shkurtuar zbret në 3 vite e 4 muaj.
Kështu, ish-një ndër ministrat më të fuqishëm të qeverisë “Rama 1”, nuk mundi ta fitojë betejën e tij, me të cilën u përball me bindjen se do dilte i pastër, këtu e katër vjet më parë.
Ai dënohet me akuzën e implikimit në trafik droge, si pjesë e procesit “Habilaj”.
Ajo që e çoi që të largohej nga qeverisja, madje të vetëlargohej dhe nga jeta parlamentare, ishin disa përgjime të drejtësisë italiane, në të cilat, në asnjë rast nuk përmendej emri e mbiemri i tij i plotë, por që aludohej nga disa fraza prej të përgjuarve se mund të qe ai.
Sidoqoftë, drejtësia italiane e nxorri të pafajshëm, por kjo shqiptare jo.
Shenjat janë për një dënim me prapavijë politike më shumë se me argument penal. /tesheshi.com/
