Dhe këtë vit nuk ka munguar “rrjedhja e tezave” të maturës, ku si çdo sezon provimesh ato shpërndahen me shpejtësinë e dritës në rrjetet sociale.
Vetëm 10 minuta pas nisjes së testit të Gjuhës Shqipe dhe Letërsisë për maturën, të gjitha pyetjet kanë përfunduar të publikuara në Facebook.
Ministria e Arsimit ka reaguar lidhur me ngjarjen e sotme me anë të një postimi në rrjetet sociale, duke thënë:
“MASR do të kallëzojë penalisht shtetasin, i cili ka publikuar testin e Maturës Shtetërore të Gjuhës shqipe dhe Letërsisë të datës 7.6.2021 në rrjetet sociale gjatë kohës kur provimi ishte ende duke u zhvilluar, si dhe të gjithë pjesëmarrësit në procesin e Maturës Shtetërore të cilët kanë shkelur rregullat duke fotografuar dhe dërguar jashtë qendrave të provimit këtë test, gjatë kohës që ishte duke u zhvilluar.”
MASR sqaron se ky rast dhe të tillë të ngjashëm po monitorohen në mënyrë që të mos ndikojnë në mbarëvajtjen dhe zhvillimin e provimeve të Maturës Shtetërore. /tesheshi.com/
