Qeveria e Kolumbisë ka njoftuar se do të fillojë gradualisht rikuperimin e objekteve nga një anije e mbytur spanjolle e vitit 1708 që besohet se mban miliarda dollarë thesar.
San Jose konsiderohet si “grali i shenjtë i mbytjeve të anijeve”, raporton Associated Press. Megjithatë, ndërhyrja në rrënoja është e diskutueshme, sepse është një thesar arkeologjik.
Ministri i Kulturës së Kolumbisë, Juan Correa, tha se përpjekjet e para do të bëhen prillin dhe majin e ardhshëm, nëse moti e lejon. Ai tha se përpjekja do të jetë thjesht shkencore, do të bëhet me një varkë robotike dhe se rrënoja është arkeologjike dhe jo një thesar.
Anija besohet se përmban 11 milionë monedha ari dhe argjendi, smeralde dhe materiale të tjera të vlefshme nga kolonitë spanjolle.
Anija spanjolle u mbyt në 1708 gjatë një beteje me anijet britanike. Ajo u zbulua vetëm në vitin 2015, por vendndodhja e saktë është një sekret shtetëror.
Tre vjet më vonë UNESCO i kërkoi Kolumbisë të mos e shfrytëzonte rrënojat komercialisht. Megjithatë, vendi nuk ka nënshkruar një konventë ndërkombëtare që e detyron atë të informojë UNESCO-n për procese nënujore. /tesheshi.com/
