Një tjetër “bombë” ka rënë në oborrin e trazuar të PD-së.
Belind Këlliçi, kreu i FRPD, deklaroi pas një mbledhjeje të kësaj organizate rinore, se një vendim i kreut demokrat Lulzim Bashës për hapjen e garës për riorganizimin dhe zgjedhjet në FRPD, është nul.
Dy ditë para se Sali Berisha të mbledhë të rinjtë demokratë në një “Foltore” të posaçme në Tiranë, Basha urdhëroi hapjen e garës për riorganizimin dhe zgjedhjet në FRPD. Një njoftim i zyrës së shtypit, kjo përligjet me arsyetimin se “mandati i shumicës dërrmuese të drejtuesve të FRPD-së ka mbaruar dhe një pjesë e drejtuesve kanë tejkaluar moshën”.
Por Këlliçi, i parreshtuar deri më tani, duket se ka marrë një qëndrim dhe ky është anti-Basha.
“Sot, jam vënë në dijeni nga kreu i Partisë Demokratike për nisjen e një procesi riorganizimi të zgjedhjeve dhe rifreskimi të strukturave të Forumit Rinor të Partisë Demokratike. Nga Kryesia e FRPD-së, ky proces konsiderohet nul. Kemi bërë fushatë për PD-në, për të zgjedhur Bashën kryeministër. Sot jemi njohur me këtë vendim që është nul, pa asnjë vlerë ligjore. Vendimi i sotëm është përtej kompetencave të kreut të PD-së. Mandati im është e vërtetë që ka skaduar, por ne jemi në të drejtën e ushtrimit të mandatit, deri në dorëzimin e institucionit tonë me mënyrën një votë, një anëtar”.
Nga ana tjetër, Berisha, nga “Foltorja” e radhës në Lushnje, e quajti vendimin e Bashës si “stalinist”.
Kështu, me gjasë, edhe rinia demokrate po anon kah Berisha e jo Basha, duke e bërë të paevitueshme shqyerjen dysh të kësaj force, e cila pritet të ndodhë, për ironi, në një datë historike për, 11 dhjetor, ditën që Berisha ka premtuar të mbledhë Kuvendin Kombëtar, prej nga pritet shkarkimi i Bashës.
Në 11 dhjetor të 90-ës, do niste rrugëtimi i PD-së si forca e parë opozitare shqiptare, pas gati gjysmë shekulli komunizëm. /tesheshi.com/
