Qeveria, me saktë dyshja në krye të saj, Rama-Balluku, njoftuan hapjen përfundimtare të Tunelit të Llogarasë, një vepër infrastrukturore që afron Bregun edhe turistik, atë që ndryshe quhet Riviera shqiptare, nga Llogaraja në Shën Vasil në Sarandë, por që heq një prej pjesëve më piktoreske të udhëtimit, Qafën e Llogarasë, ku rruga gjarpëron mes një pylli me pisha.
“Përfundojnë me një moment emocionues për të gjithë skuadrat e angazhuara, gërmimet e tunelit të Llogarasë, i cili tanimë është i hapur në krejt gjatësinë e vet, falë përmbylljes së procesit më të vështirë për ndërtimin e kësaj vepre infrastrukturore, që do të shkurtojë konsiderueshëm kohën e udhëtimit drejt Jonit, duke rritur njëkohësisht standardet e sigurisë rrugore. Një punë e bërë në kohë rekord që do të pasohet tani me proceset e tjera, deri në përfundimin e plotë të të gjithë veprës, shpresojmë në 1 qershor të vitit të ardhshëm”, shkruan Rama në FB, duke shpërndarë pamjet e tunelit të hapur, nën raportimin e zëvëndëses së tij në qeveri.
Por nga ana tjetër duhet të kujtojmë se përshpejtimi i realizimit të kësaj vepre, krahas të tjerave të ngjashme, i atribuohet investimeve të mëdha turistike në Jon, më saktë në Palasë e Dhërmi, të një të ashtuquajturi oligark.
Ndërsa në planin politik, është ndër ato vepra më pak të sulmuara nga opozita, ku në çdo projekt infrastrukturor sheh një aferë korruptive.
Një detaj i veçantë nga hapja e tunelit ishte përlotja e ministres dhe zv/kryeministres Balluku, se cilës i dedikohen disa vepra infrastrukturore si dhe disa transformime në tregun e energjisë. /tesheshi.com/
