Një prej nëpunëseve më jetëgjata në Bashkinë e Sarandës, e pacenuar aspak nga ndërrimi i kahjeve politike në drejtim, Zhulieta Riska, ka dalë në pension.
Një prej kolegeve të saj, Lorent Bineri, i dedikon këtë urim:
“Punojësja më e vjetër e DTTV (Drejtoria e Tatim-Taksave Vendore) Sarandë, 18 vite, si dhe drejtoreshë e kësaj zyre për një periudhë të gjatë.
Hartuesja e paketës së parë fiskale, punonjësja model dhe rojtarja e paepur e ligjit. Lektore dhe mësuesja model për brezin e punonjësve të rinj. Pension të mbarë!”.
Po cili është lajmi në këtë rast?
Lajm është pikërisht fakti i asaj çfarë thuhet më sipër në përshkrimin e virtyteve të saj të punës.
Zëra në bashki rendisin një trio cilësish të saj: specialiste kompetente, roje e lekut të shtetit, e pakompromentueshme.
Por sipas tyre, thënë në kofidencë, pikërisht këto cilësi që ajo gëzonte nuk e lanë që të ngjitej në karrierë, ku në fakt ajo ishte dikur në fushën përkatëse, si drejtoreshë sektori.
Por e zbritën që aty, edhe pse i kishte këto cilësi dhe m’u prej fakti se i kishte ato, të kërkuara sot te çdo rrogëtar shteti, sidomos në administratë dhe në pozicione përgjegjësie.
Ish-drejtoreshë e Tregëtisë në Sarandë para viteve ’90, Zhuljeta Riska thuhej se ishte ndër ato modele të rralla kompetence dhe aftësie në drejtim, por që nuk u preferua për më lart nga vendimmarrës për shkak të kredos së lartë morale që e karakterizonte, gjithnjë sipas komenteve kofidenciale. /sarandacity.al/
