Kishin ujë 24 orë, bëheshin gati madje të hiqnin dhe depozitat nga tarraca, por tani ndodh të kenë vetëm një orë në ditë, apo prej 24 orësh nuk kanë pikë uji.
Këtë denoncim bën një qytetar nga Lagjja Kodër, pak ditë pasi nga Ujësjellësi u tha se qyteti ka ujë por që duhet një ndërgjegje qytetare për të mos e keqshfrytëzuar apo abuzuar me të. Njëherësh u shpreh gadishmëria për t’u përgjigjur qytetarëve në çdo kohë, për çdo ankesë.
Dhe kështu, para dy netësh, nga Pallati 109 në Rr. Ismail Qemali u denoncua mospasja e ujit, grupi i specialistëve të Ujësjellësit erdhi, diç bëri dhe nga çesmat nis të rridhte uji si normalisht.
Por kjo s’gjati shumë sipas denoncimit të bërë së fundi në Sarandacity. Uji iku sërish, duke munguar më shumë se 24 orë, pa asnjë pikë siç thuhet në të tilla raste. Por njëherësh nuk po përgjigjet më as Ujësjellësi sipas denoncimit të bërë.
Ndaj, zëri që denoncon nga Pallati 109 në Kodër, thotë se këtu ka vend për dyshime, dyshime se mos uji i tyre shkon në tjetër destinacion tashmë që për të ka nevojë dhe biznesi i sezonit.
Ai s’harron të kujtojë se po bëheshin gati të hiqnin depozitat kur panë që ujë kishin 24 orë. Tani rrinë e shohin çesmën se mos rrjedh ndonjë pikë.
Fjalën e ka Ujësjellësi! /sarandacity.al/
