Vagoni B3, sedilja 67. Aty ishte ulur 23-vjeçarja fatkeqe Efgjeni Micka, e reja shqiptare mes dhjetra viktimave të aksidentit hekurudhor tragjik në Greqi. Trupi i saj u identifikua me metodën e analizës së ADN-së, ndërkohë që miqtë dhe të afërmit e kërkonin përmes rrjeteve sociale. Avokati i familjes së saj ka postuar një foto që ajo ka bërë nga brenda vagonit të trenit Intercity 62.
Fotoja e postuar nga zoti Sourlas në profilin e tij në Facebook, kap në mënyrën më mizore ashpërsinë e përplasjes mes dy trenave pasi gjithçka është shkatërruar.
Njëkohësisht zoti Sourlas duke folur për protothema.gr thekson se ajo që kërkojnë prindërit e 23-vjeçares Efgjeni është që të caktohen përgjegjësitë dhe të ndëshkohen përgjegjësit, kushdo qofshin ata.
“Familja e 23-vjeçares së ndjerë Efgjeni Micka është e dërrmuar dhe e tronditur nga vdekja e vajzës së tyre. Ajo që ata kërkojnë është që të caktohen përgjegjësitë, të dënohen përgjegjësit, kushdo qofshin ata”, tha ai.
Më herët, Stelios Sourlas duke folur për gazetarët deklaroi se askush nga kompania nuk ka kontaktuar me familjen për të kërkuar falje. “Ka përgjegjësi dhe nuk janë vetëm për komandantin e stacionit por janë të zgjeruara. Ka përgjegjësi penale në kompani dhe drejtues politikë, të cilët ndër vite nuk janë kujdesur që të mbikëqyrin masat e sigurisë që duhet të ishin, nëse do të ndiqen e edhe nëse do të ekzistonin”, tha ai.
Më pas ai tha se prej dy ditësh 23-vjeçarja Efgjeni ishte e zhdukur pasi nuk ishte as në listën e të plagosurve dhe as në listën e të vdekurve dhe familja po jetonte një thriller. “Kjo ua përkeqësoi psikologjinë, ata ishin në telefon duke pritur lajmin e mirë se vajza e tyre është gjallë. Fatkeqësisht kjo telefonatë lumturie nuk erdhi kurrë, përkundrazi erdhi ajo që u theu zemrat”, nënvizoi z.Sourlas.
Avokati tha gjithashtu se 23-vjeçarja ishte në tren me të fejuarin e saj. Ky i fundit ka shpëtuar, duke pësuar vetëm djegie nga zjarri që kishte rënë pas përplasjes së trenat.
Kujtojmë se numri i viktimave nga përplasja tragjike e dy trenave në afërsi të Larisas ka shkuar në 57 sosh.
Disa nga trupat po identifikohen nëpërmjet AND-së. /tesheshi.com/
