Dr. Skënder Brataj, kreu i Urgjencës Kombëtare Shqiptare, ka tentuar një tjetër goditje të teorive konspirative në lidhje me COVID-19, njëherësh duke apeluar për vaksinim.
“Askush përveç atyre që kanë humbur të afërmit, përveç atyre që kaluan sëmundjen, përveç atyre që u shtruan në spitale!
Përveç atyre që janë të sëmurë në këtë moment, përveç atyre që vuajnë akoma pasojat e sëmundjes. Përveç atyre që besojnë te shkenca, te mjekësia, te profesionistët! Pra pjesa më e madhe e shoqërisë, e qytetarëve! Por kush nuk e di?
Po i marrë me rradhë:
A e dinë realitetin NOVAX, a e dinë ata se shumë prej tyre humbën jetën? A e dinë ata që falë vaksinave në shekullin e 20 u zhdukën qindra sëmundje vdekjeprurëse dhe shpëtuan miliona jetë njerëzore? A e dinë konspiracionistët që shumë prej tyre humbën jetën? A e dinë se asnjë teori e tyre nuk është vërtetuar?
A e dinë shumë njerëz që ne mjekët nuk prodhojmë vaksina, nuk shesim vaksina? A e dinë që ne jemi vaksinuar të parët për t’u mbrojtur vet nga virusi dhe për t’iu mbrojtur juve? A e dinë kjo kategori njerëzish se jemi të lodhur, të sfilitur, të demoralizuar, të pa fuqishëm të luftojmë vetëm? A e dinë sa ankth kemi për familjet tona, fëmijët tanë, njerëzit tanë, ër shëndetin e qytetarëve?
Kjo sëmundje nuk zgjedh, kjo sëmundje nuk e ka me individin, kjo sëmundje e ka me të gjithë botën!
Individi dëmton shoqërinë me veprimet e tij të pamatura!
Ndodh njëherë në 100 vjet që sëmundje të tilla të shfaqen para njerëzimit!”, shkruan ndër të tjera Dr. Brataj. /sarandacity.al/
