Për qytetarin sarandiot që dëshiron të shijojë borë këto ditë dimri e në vijim, tashmë që variantet e afërta greke të turizmit malor janë vështirësuar për shkak të masave pandemike të shtuara, maja e Çajupit afro 1 e gjysmë larg mund të qe nëj variant ngushëllues.
Fusha e Çajupit prej vitesh është kthyer në një destinacion turistik në të gjitha stinët e vitit, por në stinën e dimrit mbetet një nga më të rrallat për t’u vizituar, raporton ATSH.
Gjithsesi, në funksion të një promovimi më të madh, administrata e Zonave të Mbrojtura Gjirokastër postoi pamje nga Fusha e Çajupit e cila është mbuluar me borë këto ditë, rënë gjatë rreshjeve të dendura të ditëve të fundit .
Fusha e Çajupit ndodhet në Parkun Natyror “Zagori” rreth 1200 metra mbi nivelin e detit dhe 25 km larg Gjirokastrës.
Natyra e egër, ajri i pastër, mjedisi i këndshëm ofron mundësi për të kaluar momente qetësie, sidomos për ata që duan të largohen nga jeta e zhurmshme urbane, larg stresit dhe rutinës së përditshme.
Përveç bimësisë së egër, shkurreve, dëllenjës, me ligjin e moratoriumit në Fushën e Çajupit dhe Parkun Natyror “Zagori” janë shtuar kafshët e egra që gjenden në habitatin e tyre natyror si personazhe të përjetshme të këtij peizazhi fantastik të natyrës shqiptare.
Mali i Çajupit mbetet edhe një ftesë e hapur për të apasionuarit pas turizmit malor.
Qafa e Çajupit është një hapësirë ku mund të shohësh dy pamje mahnitëse, në njërën anë nga lindja, Fusha e Çajupit dhe nga perëndimi, Lugina e Drinos me hiret e saj. Të apasionuarit pas natyrës dhe aventurës mund të zbulojnë një destinacion për hiking dhe hipizëm, shkruan ATSH.
Rruga deri sipër në majë, ku ka një pllajë por jo shërbime turistike veç një restoranti, është tërësisht e asfaltuar. /sarandacity.al/
