Zbardhet marrëveshja: Kakavija, doganë e përbashkët apo pikë sigurie?

Duket se pika e përbashkët doganore me Greqinë në Kakavijë nuk do të jetë aspak e tillë, por do shërbejë si një kanal për trajtimin e informacioneve që lidhen me krimet e trafiqet në të dy anët e kufirit, veçanërisht gjithçka që ka të bëjë me rrezikun e pastrimit të parave.

Detajet vijnë nga Fletorja Zyrtare, te e cila është publikuar marrëveshja mes Shqipërisë e Greqisë për ngritjen e Qendrës së përbashkët Policore dhe Doganore.

Nga dokumenti zyrtar bie në sy se bëhet fjalë për një qendër të analizimit të informacionit për çështjet e përbashkëta, jo për kalimin e njerëzve e mallrave, puna e së cilës në asnjë rast nuk do i mbivendoset punës së Policisë dhe Doganave.

Por cilat do të jenë saktësisht funksionet e saj?

Ajo do trajtojë “çështjet e legjislacionit përkatës kombëtar të palëve; me fokus te çështje të migracionit të paligjshëm, kontrabandimit të emigrantëve dhe refugjatëve/trafikimi i qenieve njerëzore dhe veprimtaritë e paligjshme që lidhen me to, por dhe me çështje të ekstremizmit të dhunshëm dhe rekrutimit të luftëtarëve të huaj.

Detyrë tjetër e qendrës do jetë bashkëpunimi kundër krimeve dhe shkeljeve që lidhen me falsifikimin e dokumenteve të udhëtimit, kartave të identitetit, vizave dhe lejeve të qëndrimit, krimeve dhe shkeljeve që lidhen me kultivimin e paligjshëm, prodhimin, eksportin, transportin dhe trafikimin e lëndëve narkotike, trafikimin e armëve, municioneve, lëndëve plasëse, mallrave me përdorim të dyfishtë, armëve biologjike dhe kimike, materialeve toksike, bërthamore dhe radioaktive;

Kontrabanda e automjeteve do të jetë një prej përparësive kryesore të qendrës së përbashkët, ndërkohë që bashkëpunim të thelluar do ketë edhe sa i përket parave të falsifikuara, si dhe për çështje të krimit të organizuar që lidhet me pronën, vjedhjes së metaleve, si edhe kontrabandimit dhe transportit të të ardhurave që rrjedhin nga veprimtaria kriminale”.

Shqipëria numëron aktualisht 7 pika doganore me Greqinë, por vetëm ajo e Kakavijës do të ketë rolin e trajtimit të informacioneve për krime apo pastrim parash. /scan/