Zjarret në pyje të shkaktuara nga erërat e forta shpërthyen të martën, më 30 korrik, në Evropën Jugore, duke djegur pyje dhe shtëpi dhe një vendpushim shqiptar, Shëngjini, duhej të evakuohej, raportojnë disa media rajonale.
Temperaturat mbi mesataren dhe kushtet e thata janë regjistruar në rajon gjatë muajit të kaluar, duke krijuar kushte ideale për zjarret, thonë shkencëtarët. Zjarri përfshiu pyllin me pisha përreth kompleksit hotelier në qytetin bregdetar shqiptar të Shëngjinit, duke çuar në evakuime banorësh e turistësh.
“Situata është ende shumë problematike pavarësisht angazhimit të plotë në nivel kombëtar”, njoftoi Ministria e Mbrojtjes e Shqipërisë.
Në Maqedoninë e Veriut, jo shumë larg kufirit grek, pesë shtëpi u dogjën dhe pati edhe evakuime, thanë zyrtarët lokalë. Banorët thanë për mediat lokale se furnizimi me energji elektrike ishte ndërprerë dhe se shërbimet telefonike ishin gjithashtu të ndërprera. Një zjarr më në veri të hënën dogji dhjetëra ndërtesa të tjera dhe vrau një person.
“Kemi shumë zjarre. Mijëra hektarë janë prekur, gjysma e vendit është në zjarr,” i tha Reuters-it Goran Stojanovski, një zyrtar i agjencisë së menaxhimit të emergjencave të Maqedonisë së Veriut, duke shtuar se erërat e forta po e bëjnë të vështirë për zjarrfikësit.
Në Bullgari, zjarrfikësve iu desh të ndalonin luftën me zjarret në malin Slavjanka pranë kufirit me Greqinë të martën pasi minat e mbetura nga Lufta e Ftohtë filluan të shpërthejnë, njoftoi media lokale Nova TV.
Ndërkohë, më shumë se 200 zjarrfikës me mbështetjen e helikopterëve dhe avionëve arritën të frenojnë zjarrin në Evia, ishullin e dytë më të madh grek, pasi autoritetet urdhëruan evakuimin e dy fshatrave, njoftoi brigada e zjarrfikësve.
Kryeministri Kyriakos Mitsotakis tha se Greqia po përballet me një “verë shumë të vështirë” për sa i përket kushteve klimatike. “Para nesh është një muaj shumë i vështirë gushti dhe padyshim që duhet të jemi në gatishmëri të lartë”, tha ai në seancën e qeverisë.
Zjarret në pyje në Greqi janë bërë më të shpeshta vitet e fundit gjatë verës gjithnjë e më të nxehtë dhe të thatë që shkencëtarët e kanë lidhur me ndryshimin e klimës. Vitin e kaluar, sipas të dhënave të zjarrfikësve, shpërthyen më shumë se 8,000 zjarre. Qindra zjarre janë ndezur që nga maji në të gjithë Greqinë, e cila regjistroi qershorin më të nxehtë ndonjëherë dhe valën më të gjatë të të nxehtit. /tesheshi.com/
