Edmond Zogaj, i riu i arrestuar të nesërmen e zjarrit në Ksamil, rezulton të jetë me shëndet të mangët mendor.
Aktualisht, 25-vjeçari që di të bëjë vetëm çobanin, ndodhet në arrest të shtëpie.
Për të, Gjykata e Sarandës me gjyqtare Suela Xhani, në seancën e datës 1 gusht 2021, ndërsa e vlerësoi të ligjshëm ndalimin e tij në flagrance, vendosi si masë të sigurimit personal “ Arrest shtëpie”.
Si i tillë ai nuk do të mund të largohet dot nga banesa e vet në Ksamil pa autorizimin e prokurorit ose të oficerit të policisë gjyqësore.
Mësohet nga burime jo zyrtare se 25-vjecari është gjetur atë ditë në zonën ku ka rënë zjarri dhe, meqë ka qenë duke kullotur bagëtitë, është bërë lidhja e tij me zjarrin.
Por babai i tij Hidajet Zogaj ka reaguar menjëherë për ndalimin e të birit duke u shprehur se ai është i sëmurë, e vërtetuar kjo edhe nga shkresa përcjellëse – epikrizë e invaliditetit me diagnozën me “prapambetje mendore e rëndë me dëmtime të theksuara…”.
Ndërkohë ai vë në dispozicion edhe gjithë dokumentacionin përkatës që vërteton sëmundjen e të birit. /sarandacity.al/
