Deputetja e Sarandës, njeherësh zëdhënësja e PD-së, Ina Zhupa, në një konferencë për mediat foli në lidhje me zgjedhjet e pjesshme lokale të 6 marsit në 6 bashkitë pa kryetarë. Sipas saj, PD ka kaluar një proces për përzgjedhjen e kandidatëve që është njohur nga të gjitha palët, përfshirë këtu edhe Sali Berishën dhe Komisionin e Rithemelimit.
“Partia Demokratike ka kaluar një proces të njohur nga të gjitha palët. Edhe ata që sot vetëquhen Komisioni Rithemelimi ka qenë pjesë e procedurave për zgjedhjen e kandidatëve.
Një proces që mori kohën e vet për kalimin në filtra dhe nga Komisioni. Kjo gjë na shërben të jemi gati edhe për zgjedhjet e pjesshme lokale në 6 bashki”, tha ajo, duke besuar se PD mund t’i fitojë.
“Ne do të bëjmë përpjekjet që demokratët të përfaqësohen nga demokratët më të mirë. Nga njerëz që nuk kanë rekorde kriminale, nuk janë të lidhur me afera. Kemi të garantuar fitoren në këto bashki për sa kohë drejtohemi me pastërtinë e një programi dhe pastërtinë e një kandidati.
Nuk shqetësohemi nëse individë të caktuar i bashkohen një alternative të së shkuarës”, u shpreh Zhupa. /tesheshi.com/
