Mazhoranca i ka dhënë deri trajtë bullizimi një gafe arithmetike të kryedemokratit Basha në parlament, atë “7 herë 7, 42”, e cila, për cinizëm, i përket debatit mbi iceneratorët, një aferë korruptive sipas opozitës. Se ja, sado naiv Basha, sado akuzatore e rëndomtë opozita, deri në bezdi e neveri, si shprehje e paaftësisë së saj për të patur mendim politik, aty ku paska patur zë s’qenka pa gjë.
Nuk është e thënë se ç’nxjerr prej goje politika, palët ndaj njëra-tjetrës, sidomos opozita që e ka akuzën bosht identitar, të jetë e vërtetë. Por kjo nuk do të thotë se dhe ajo s’ja qëllon në pretendimet e saj. Se tek e fundit, njolla më e madhe e qeverisjes “Rama” është pikërisht një uri e paparë në shumë nivele pushteti “për të bërë lek”. Ka rrëzuar kjo dhe tezën e tij se është sistemi që korrupton dhe jo e kundërta. Jo, nuk është sistemi. Sistemi mund të ketë një prej aksesorëve ndihmës, pasi në thelb është morali individual. Nuk është e thënë që të gjitha nivelet e mazhorancës të kishin morale individuale për të mos prekur paranë publike, kjo është e pamundur, por Rama ka dështuar ta imponojnë si frymë këtë. E kundërta, fryma e të zhvaturit ka qenë dominant gjithë këto vite të pushtetit të tij. Këtu është dhe përgjigja se pse qeverisja e tij, edhe pse cytaz me reforma, si asnjë tjetër para saj, edhe me vizione shumë më të avancuara se të gjitha paraardhëset, edhe me shndërrime të qarta për syrin si asnjëherë në 30 vite, nuk ka arritur dot të jetë shpresë e besim për atë që dhe vetë Rama e ka patur me merak, faktin që Shqipëria mund të bëhet.
Në shumë drejtime, Shqipëria s’ka qenë më mirë se sa sot, ku për inerci zhvillimore e ku për meritë të qeverisë, por nuk është më e mirë në thelbin e vet, aty ku është shprishur keqaz, në moralin si shoqëri. Dhe përgjegjës për këtë është pushteti, prej nga ka rrjedhur modeli i keq.
Me këtë që ka ndodhur së fundi, ku ka dalë në pah afera e iceneratorëve me para publike, gafa arithmetike e Bashës ngjan si diçka simpatike.
Çështja është a do ja përmendë më gojëtaria e mazhorancës, sepse qartazi, bullzimi i kthyer në boomerang! /sarandacity.al/
