Grupimi “Për PD-në”, në krye të të cilit është ish-presidenti Nishani, kërkon dorëheqjen e kreut demokrat Basha. Si shkak është zhvillimi më i fundit në këtë parti, largimi prej Bashës i Berishës nga grupi parlamentar, pas presionit amerikan.
“Partia Demokratike duhet të ringrihet dhe reformohet si një parti e djathtë bashkëkohore, me një projekt të ri të bazuar në idealet e themelimit të saj.
PD-ja e marrë peng duhet t’i kthehet demokratëve dhe anëtarësia e saj e gjerë dhe e pandikuar, e pakushtëzuar, duhet të vendosë mbi të ardhmen e saj.
Dorëheqja ose largimi i Lulzim Bashës nga pozitat e Kryetarit në detyrë duhet të jetë akti i parë dhe i menjëhershëm drejt këtij reformimi”, thuhet në deklaratën e grupimitt “Për PD-në”.
Sipas këtij grupimi, “vendimi i fundit i Kryetarit në detyrë të Partisë Demokratike për përjashtimin e Sali Berishës nga grupi parlamentar i PD-së, është antistatutor dhe në vazhdën e të gjitha vendimeve antistatutore e antidemokratike të ndërmarra që prej vitit 2017”. /sarandacity.al/
