Kryeministri Rama beson se turizmi po shndërrohet në ambasadorin më të mirë të Shqipërisë pas një imazhi disavjeçar jopozitiv mbi vendin tonë.
Këtë ia tha ai një mediaje spanjolle gjatë një interviste.
“Perceptimet kanë të bëjnë me të shkuarën, me një informacion që ende nuk është fluid, i rrjedhshëm. Por mund t’ju them se tashmë po e thonë të gjithë, edhe një numër përherë e më i madh turistësh spanjollë që vijnë në Shqipëri, se ka një ndryshim të madh midis asaj që perceptohet nga larg për Shqipërinë dhe realitetit të saj.
Sigurisht që duhet të përparojmë më tej me reformat tona për modernizim, me përmirësimin e qëndrueshëm të ekonomive dhe shoqërive tona, me fuqizimin institucional dhe, në fund të fundit, të shkojmë drejt një mjedisi më të mirë ekonomik dhe social rajonal, por këto janë sfidat e vendeve që janë në rrugëtim e sipër”, argumentoi i pari i qeverisë.
Ironia është se një ndër incidentet e viteve të fundit më sfond turizmin, ai me protagonist Mihal Kokëdhimën, pati në qendër pikërisht turistë spanjollë.
Këta të fundit, një familje e pasur, u ndoqën nga Kokëdhima në një mënyrë hollivudiane, nën pretendimin se në restorantin e tij, ata porositën ushqim por nuk hëngrën. /sarandacity.al/
