Në takimin e Beogradit në kuadër të projektit “Open Ballkan”, kryeministri Rama veçoi prurjet e shumta turistike nga Serbia, pra, valën e ardhjes së serbëve në Shqipëri, shtuar viti pas viti e kulmuar sezonin e lënë pas.
“Fluksi i turistëve nga Serbia është rritur me 63%. Fluksi i turistëve nga RMV është rritur me 22%. Janë shifra që janë rezultat i drejtpërdrejt në ekonomi”, tha kreu i qeverisë teksa komentoi situatën e turizmit, duke shtuar më pas:
“Ballkani i Hapur është një nismë në shërbim të njerëzve, të mirëqenies ekonomike, shoqërisë të këtyre popujve që përtej mos-dakordësive mes tyre meritojnë të jetojnë më mirë”.
Kryeministri theksoi se nga janari 2022 do të nisin përpjekjet për lehtësimin e kalimit në kufi për produktet e fermerëve dhe kompanive.
“Jemi angazhuar që nga janari në kufijtë e vendeve të fillojë një relaksim shumë i ndjeshëm për kompanitë, distributorët dhe fermerët”, deklaroi ai.
Ai tha se një treg i përbashkët është shumë më i fuqishëm dhe përthith më shumë investime direkte. /sarandacity.al/
