Policia shqiptare dhe ajo italiane bën me dije goditjen e një rrjeti trafiku klandestinësh nga Lindja e Mesme, ku siç u tha, ndër episodet e dokumentuara gjatë hetimeve ishte dhe Saranda krahas disa qyteteve shqiptare.
Fjala është për katër grupe kriminale që e drejtonin këtë trafik, ku për çdo person merrnin 10 mijë euro.
Drejtori i Departamentit të Policisë Kriminale, Tonin Vocaj tha se “gjatë hetimeve të kryera është dokumentuar fakti që pjesëtarë të katër grupeve kriminale ushtronin në bashkëpunim kontrabandimin nga Lindja e Mesme drejt Italisë me destinacion vendet e BE”.
“Ata siguronin persona të ndryshëm nga shtetet e Irakut apo Sirisë dhe i kontrabandonin. Janë dokumentuar 30 episode të ndryshme kontrabandimi.
Janë dokumentuar 7 episode të kontrabandimit nga Lindja e Mesme në Tiranë, Korçë, Gjirokastër, Elbasan, Fier, Vlorë dhe Sarandë. Është dokumentuar aktiviteti kriminal i këtij grupi të strukturuar.
Pas kërkesës nga SPAK me vendim përcaktimin e masës së sigurimit është urdhëruar arrestimi i 25 personave në Shqipëri. 18 janë shqiptar dhe 7 janë të huaj, palestinezë, iranianë dhe turq”, tha Vocaj. /sarandacity.al/
