Dehja në timon ka shkaktuar një tjetër tragjedi rrugore në Shqipëri. E pranuar tashmë se shumë prej aksidenteve kanë si shkak alkoolin, ky fenomen po merr përmasat e një gjëme.
Rasti i fundit është shënuar në Durrës, në Shkozet më saktë, pranë Gjykatës së Apelit në këtë zonë të qytetit bregdetar, ku dy fëmijë të komunitetit rom, 13 vjeç dhe 15 vjeç, kaluan tragjikisht në botën e përtejme.
Ata po udhëtonin me të atin e tyre në një çiklomotor, kur u goditën nga pas prej një automjeti që drejtohej nga një i ri nën avuj alkooli.
Autori është Xhoni Muço, 23 vjeç, i arrestuar tashmë.
Kujtojmë se dhe një ndër askidentet më të rënda të kohëve të fundit në Sarandë, ai në Qafë Gjashtë tetorin e kaluar, trajtuar si proces dhe nga Fiks Fare së fundi, kishte si shkak alkoolin te drejtuesi i një Mercedesi që morri përpara një të ri.
Arbjas Kreci, 29 vjeç, sot vuan dëmtimin e këmbëve dhe nuk dihet nëse do i rikthehet jetës normale si para asaj nate kur e pësoi nga papërgjegjshmëria tipike e atij që pasi ka rrëkëllirë gote pas gote, s’e ka për gjë të hipë në timon. /sarandacity.al/
