Autoritetet greke kanë gjetur një tjetër mënyrë dhe të vecantë për të futur në grackë rrjetin e trafikimit të kokainës në ishullin e erërave në Mikonos, ku ndër të arrestuarit janë dhe dy shqiptarë.
Sipas protothema.gr, policia përdori si “karrem” një 19-vjeçare, e cila njihet me pseudonimin “flokëkuqja”.
Vajza luajti një rol kyç në operacionin sekret që nisi në Rafina dhe përfundoi në një hotel në Petinaros, Mikonos, ku si përfundim u shkatërrua grupi që drejtohej nga personi i njohur si “mjeku i kokainës”.
Si ndodhi operacioni
Në orë 16.20, të së martës së kaluar, policia i ishte vënë në ndjekje të 19-vjeçares me flokë të kuqe, e cila, hipi në portin e Rafinës, për të shkuar në drejtim të Mikonos. Ata e ndaluan të renë dhe gjatë kontrolleve i gjetën 207 gramë kokainë.
Më pas, disa efektivë nisën udhëtimin me të drejt ishullit të njohur grek, me qëllim, kapjen e personave të tjerë të rrjetit. Sapo zbritën në Mikonos, policët së bashku me 19-vjeçarën morën një taksi, për t’u drejtuar në hotelin ku qëndronte bosi i drogës.
Gjatë gjithë rrugës, e reja fliste në telefon me një person që i jepte udhëzime nga burgu i Koridhalos. Duke ndjekur me përpikmëri udhëzimet e drejtuesit, vajza u takua me dy persona.
Në këtë moment ndërhyri sërish policia, e cila arrestoi dy burra. Ndërsa e reja tregoi me detaje shumën që do të përfitonte nga ky shërbim. Ajo ka thënë se fillimisht ishte shpërblyer me 600 euro dhe do të përfitonte 400 të tjera kur të kthehej në Athinë. /sarandacity.al/
