Ditët e fundit ka dalë nga botimi dhe është në qarkullim libri “Qershori i Përflakur i Bregut” me autor Anastas Gurma, një ish-ushtarak i lartë dhe intelektual i njohur i Sarandës.
Libri është i natyrës historike. Në qendër të tij është një ngjarje tragjike e Luftës së Dytë Botërore e ndodhur në fshatrat e Bregut gjatë operacionit nazist të qershorit 1944.
Ngjarja është e patrajtuar nga historiografia shqiptare dhe në këtë libër dokumentohet për herë të parë.
Libri është i ndarë në tri pjesë:
-Historia dhe pasojat e masakrës në bregdet;
-Kujtime nga Operacioni i Qershorit dhe kampet e internimit;
-Fotografi të ndryshme individësh nga kampi i internimit Stalaga VII A Mosburg, Gjermani që flasin shumë.
Në këtë libër përshkruhen në mënyrë të hollësishme ngjarjet tragjike që kanë ndodhur gjatë Operacionit të Qershorit në 1944 në fshatrat e Bregut.
Lexuesit në këtë libër do të gjejnë ngjarje historike dhe episode të padëgjuara. Do të gjejnë emrat dhe fotografi të internimit të të gjithë bregdetasve të internuar dhe të pushkatuar nga Nivica, Shën Vasili, Lukova, Sasaj, Piqerasi dhe Borshi.
Do të gjejnë emrat dhe historitë e gjyshërve të tyre. Do të njihen me vuajtjet që ata kanë kaluar, me dramat dhe tragjeditë që kanë shoqëruar ata dhe fëmijët e tyre që lanë pas.
Ky libër duhet të jetë në bibliotekësn e çdo bregdetasi. Ai gjendet në të gjitha fshatrat e Bregut. /sarandacity.al/
