Deputetja e Sarandës Ina Zhupa tha se PD do të mbështesë marrëveshjen e Memorandumit të Mirëkuptimit me SHBA për materiale arkeologjike.
“Siç e thotë dhe DASH në shpjegimet zyrtare kjo marrëveshje ilustron marrëdhëniet e qëndrueshme të SHBA me Shqipërinë për të kundërshtuar trafikimin e pronave kulturore dhe për të ruajtur trashëgiminë.
Marrëveshja i lejon SHBA-së të vendosen kufizime importi për kategori të caktuara të pronave kulturore të Shqipërisë duke zvogëluar kështu mundësinë për plaçkitje e vendeve arkeologjike dhe historike në Shqipëri.
Marrëveshja u jep mundësi autoriteteve amerikane që të kenë aftësinë për të riatdhesuar objekte kulturore trafikuar në Shqipëri dhe të nxis shkëmbimet e trashëgimisë kulturore mes dy vendeve”, tha ajo në Kuvend.
Më pas iu kthye qeverisë, me pretendimin se arkeologjia e arkeologët janë vënë në vështirësi në 8 vite të qeverisjes së PS-së.
“Pra, në do ta votojmë pro, por nuk mund të lë pa thënë disa të vërteta të mëdha në lidhje me këtë fushë.
Në Shqipëri ka pasuri arkeologjike por nuk ka pasur në këto 8 vite vullnetin dhe parat në dispozicion për t’i venë në dukje këto pasuri.
Arkeologët në Shqipëri janë gjendur përballë vështirësive të mëdha të punës në terren dhe zero buxhet për ta. Ata kanë mungesë laboratorësh dhe ambiente për studimin, konservimin, inventarizimin e objekteve arkeologjike që zbulohet.
Mungesa e ekspeditave dhe restaurimi të objekteve ekzistuese ka çuar dhe në degradimin e pjesëve të tyre por dhe në hapjen e mundësisë për vjedhjen e tyre nga çdo keqbërës”, u shprehe deputetja e Sarandës. /sarandacity.al/
