Në pak ditë pritet të përfundojë asfaltimi i afro 1 km segment nga kryqëzimi i Shijanit e deri aty ku nis territori i Bashkisë Finiq, që korrespondon me hyrjen e varrezave të Finiqit.
Eshtë një financim i buxhetit të shtetit që, në bashkëpunim e Bashkinë Delvinë do mundësojnë më në fund shtrimin e një 1 kilometri thënë pa teprim ferri, i cili prej vitesh ishte lënë në degradim.
Për vetë distancën e shkurtër, e për vetë kontrastin e “prerjes me thikë” mes Finiqit e territorit të Delvinës, segmenti ngjante si një dënim a persekucion për këtë të fundit.
Segmenti gropa-gropa, një torturë për çdo lloj automjeti, pamundësonte gjithashtu dhe një lehtësi për drejtuesit e automjeteve që, në shkuarjen apo ardhjen nga Muzina, detyroheshin, për t’ju shmangur vuajtjeve të ferrit në atë 1 kilometër, t’i binin nga Gajdari.
Por tashmë, falë afrimit të zgjedhjeve, edhe nga fakti se ishte një premtim i kryebashkiakes Majlinda Qilimi, ky segment po merr pamje njerëzore.
Makineritë e rënda të shtrimit janë aty dhe në pak ditë asfalti i ëndërruar do jetë realitet. /sarandacity.al/
