Kryetari demokrat Basha kujtoi përvjetorin e numrit të parë të RD-së (Rilindja Demokratike), e cila pati për kryeredaktor të parë pikërisht njeriun që sot është ndër më penëashpërit ndaj Berishës, Frrok Çupin.
Ndërkaq, në dedikimin kushtuar përvjetorit të kësaj gazete, Basha ka huazuar padashje një term që identifikohet me protagonizimin e Edi Ramës në atë kohë. Fjala është për “refleksione”. Kujtojmë që “Refleksione” qe një lloj cikli debatues intelektual themeluar nga Rama në Akademinë e Arteve, i cili u praktikua vetëm nga një pjesë e degëve të sapothemeluara të PD-së në rrethe.
“Mëngjesin e 5 janarit 1991, pas një pritje gjysmë shekullore, ‘Fjala e parë’ mbërriti në duart e shqiptarëve. Rilindja Demokratike, e para media opozitare në Shqipëri, u bë themeluesja e shtypit të lirë shqiptar, duke shënuar përgjithmonë historinë e re të vendit.
Një tribunë refleksionesh mbi regjimin komunist e të shkuarës dhe mbi demokracinë e shumëpritur të së ardhmes, vepër e intelektualëve, gazetarëve, studentëve, që i’u bashkuan prej orës së parë Partisë Demokratike, për të sjellë fjalën e lirë, votën e lirë dhe ribashkimin me Perëndimin”, shkruan ndër të tjera Basha, duke nxituar ta potencojë këtë përvjetor demokrat në momentet e vështira të një beteje të brendshme me Berishën, se cilit pret të dyve i përket partia.
Ndërkohë, si i vonë në politikë dhe pa njohje apo profil parapolitik, Basha i mungon dhe këtij momenti historik të PD-së. Pra, i mungon një përvojë personale e lidhur me gazetën e partisë që drejton. /sarandacity.al/
