Kreu demokrat theu më në fund heshtjen ndaj dilemës “Berisha”, duke marrë atë vendim të paimagjinueshëm deri më sot: largimin e liderit historik, babait të tij politik, nga grupi parlamentar demokrat. Sipas tij, derisa të dalë në dritë e vërteta e vendimit të Departamentit Amerikan të Shtetit.
Pra, në një farë mënyre nuk e vrau por e plagosi “babanë” e tij. Gjithnjë politik.
“Për të shmangur çdo keqkuptim dhe për të konkretizuar këtë qëndrim të vetë z. Berisha, kam vendosur që deri në përfundimin e shqyrtimit të kërkesës ligjore për transparencë dhe zbardhjes së plotë të kësaj çështje në rrugë gjyqësore, z. Berisha nuk do të jetë anëtar i Grupit Parlamentar të Partisë Demokratike”, tha Basha në një deklaratë.
Më parë, ai u shpreh: “Të gjithëve bashkë na u desh të njiheshim me vendimin e Departamentit Amerikan të Shtetit për shpalljen non-grata të ish Presidentit, ish-kryeministrit dhe liderit historik të Partisë Demokratike Sali Berisha.
Prandaj dhe që ditën e parë ku u njoha me vendimin e Departamentit Amerikan të Shtetit iu bashkova thirrjes për transparencë të plotë mbi çdo fakt e dokument që ka lidhje me këtë vendim”, tha ndër të tjera i pari i PD-së. /sarandacity.al/
