Reagimi: Rama premtoi kthimin e faqes tjetër, PD s’ndal goditjet

PD ka refuzuar moralin e ri që Rama promovoi për tjetërlloj sjelljeje politike ndaj saj.

Duke i mëshuar një gjuhe të instaluar së fundmi pas humbjes së radhës në zgjedhje, nga selia e demokratëve doli kjo përgjigje:

“Edi Rama është autori i masakrës elektorale dhe tjetërsimit të vullnetit të shqiptarëve për ndryshim. Me qëllim që të largojë vëmendjen ai vazhdon gënjeshtrat, manipulimet dhe diversionet.

Vjedhja e zgjedhjeve nga Rama-Doshi-Rakipi e çuan vendin tonë drejt një masakre masive elektorale, ku viktimat janë qytetarët shqiptarë dhe e ardhmja e tyre.

Detyra jonë ndaj shqiptarëve është të qëndrojmë të vendosur dhe të luftojmë fort për kthimin e demokracisë në vend.

Asnjë diversion nuk do të na ndalë në këtë betejë, duke filluar me shpalosjen e fakteve, provave dhe të dhënave që dëshmojnë përmasën e plotë të masakrës zgjedhore nga regjimi Rama-Doshi-Rakipi”. /sarandacity.al/