Denaj, nga Finiqi në Konispol: zgjidhje hallesh, fuqizim partie!

Deputetja Denaj pati një fundjavë të ngarkuar takimesh me theks partiak, shoqëruar dhe nga kolegu Niko Kuri në disa raste, siç në Finiq.

Pas një takimi në në Çukë dhe Berdenesh, ajo shkroi mbi atë çfarë është e ndjeshme në këto zona, ku veçojnë legalizimet.

“Dëgjesat me banorët janë gjithmonë të rëndësishme, jo vetëm në periudha zgjedhore, por në vijmësi, për t’i siguruar se hallet dëgjohen dhe zgjidhja e tyre është prioritet i punës sonë.

Çështjet e legalizimeve dhe ato të azhurnimit të hartave të tokave janë disa nga problematikat, të cilat do të vijojmë t’i ndjekim bashkërisht me institucionet lokale, përgjegjëse, përmes takimeve periodike”.

Në Konispol, theksi u vu tek ridinamizimi partiak, si dhe problemet që bart zona në aspekt social-ekonomik.

“Diskutuam mbi nevojën për riorganizimin e strukturave të partisë dhe zgjerimin e bazës, përmes nxitjes së regjistrimit elektronikë.

Synimi ynë është afrimi i grave, vajzave dhe i të rinjve, për një hapje sa më të madhe dhe reale të Partisë Socialiste.

Ndjekja e vazhdueshme e proceseve dhe kërkesave për certifikatën e pronësisë;

zhvillimi i kulturave tradicionale;

zgjidhja përfundimtare e situatës energjetike dhe rritja e kapaciteteve,  ishin disa nga problematikat që diskutuam”.

Ndërsa për takimin në Finiq, shënimi qe i përgjithshëm e skematik.

“Analizuam bashkërisht rezultatet zgjedhore të 25 Prillit dhe parashtruam në vijmësi objektivat tona, për një riorganizim të plotë të strukturave të partisë me qëllim rritjen e efikasitetit.

Qytetarët dhe nevojat e tyre janë në fokus të punës tonë dhe ne jemi të angazhuar për zgjidhjen e problematikave, veçanërisht ato që kanë të bëjnë me pronësinë, rritjen e cilësisë së  shërbimeve dhe zhvillimin e zones”. /sarandacity.al/