Deputetja në pritje Anila Denaj ka promovuar fuqimisht Delvinën orët e fundit me disa postime radhazi.
Për qytetin që dy-tre vitet e fundit ka rënë në një “koma” ekonomike, duke qenë dhe në një udhëkryq mbi atë se çdo të jetë nesër, ministrja e Financave e cila do jetë në krye të çdo pune aty për katër vjet, ka tentuar t’i japë një dorë, së paku në promovim.
“Delvina ka një ofertë të pasur për kombinimin e turizmit rural me atë kulturor.
Midis zonave që duhen vizituar absolutisht, Xhamia e Gjin Aleksit në Rusan, kompleksi i Xhermehallës, Kalasa me burimin e lumit në Tatzat dhe Manastiri i Kamenosë.
“Kulinaria është gjithashtu e pasur. Byreku me mish pule, role me patëllxhanë dhe japrakë me të përbrendshmet e qingjit janë pjatat e mrekullueshme, që mund të shijohen së bashku me një gotë verë të zones”, shkruan ajo, duke e ilustruar këtë me disa foto.
Gjithashtu, ndalet te traditat e tjera, duke thënë se “Delvina është e pasur në traditë, si në atë të veshjeve, ashtu edhe të muzikës popullore.
Kostumet ceremoniale janë të shumta dhe të larmishme. Ato dallohen nga thjeshtësia dhe qëndisjet me fije ari e argjendi.
Muzika popullore gjithashtu është pjesë e trashëgimisë. Sazet e Delvinës janë të veçanta.
Ato ruajnë fizionominë e qytetit, traditave dhe zakoneve. Më të njohurat janë ‘Sazet e Delvinës’, grupi polifornik ‘Djemtë e Delvinës’ dhe Zërat e Rinj’”.
Dhe si “qershia mbi tortë” vjen një video që paraprihet nga fjalët:
“Gratë duararta të Delvinës që ruajnë traditën dhe e trashëgojnë atë brez pas brezi”. /sarandacity.al/
