Deputetja e Sarandës promovon Beratin

“Mirëmëngjesin” e saj, tipik të qeverisjes që përfaqëson në stilin komunikativ me publikun, deputetja e Sarandës Anila Denaj e ka përcjellë nga Berati.

Ajo ka ofruar pamje nga kalaja e lagjja e atyshme, njëherësh duke përcjellë një guidë se ç’mund të haset aty në kontekst turisik.

“Mirëmëngjesi nga Berati!

…qyteti i ‘një mbi një dritareve’ ka shumë çfarë t’ju ofrojë turistëve të të gjitha moshave, nga vlerat historike, monumentale, kulinare etj..,

Kalaja e Beratit është nga më të bukurat në Shqipëri. Nga romakët, ajo u quajt Fortesa e Arbërve ndërsa, në vitin 216 p.e.s, ajo u përmend me emrin e lashtë Antipatrea. Si në asnjë kala tjetër, në vend ka jetë brenda mureve të lashta dhe kjo e bën unike.

Muzeu i Onufrit mban këtë emër për të nderuar kryemjeshtrin e pikturës shqiptare të shekullit të 16-të. Përmban një koleksion me  shumë objekte të përzgjedhura nga fondi i kishave dhe manastireve të Shqipërisë dhe qytetit të Beratit.

Lagjja Mangalem, ka formën e një piramide elegante që imiton siluetën e kodrës, në majën e së cilës është ngritur kështjella.

Lagjja Goricë, përbëhet nga shumë banesa që janë monumente kulture, si dhe nga dy kisha të vjetra: e Shën Spiridhonit dhe e Shën Thomait.    

Teqja e Helvetive, një nga monumentet më të bukura të kultit Bektashi në Shqipëri.

Të pasionuarit e verës dhe jo vetëm do të ndihen të privilegjuar pasi Berati ka kantina të mrekullueshme, si Çobo e Nurellari, që do ju bëjnë të ndiheni si në shtëpi”, shkruan Denaj. /sarandacity.al/