E synon Finiqi: rikthim i lavdisë bujqësore të Vurgut me ekspertizë greke

Kryebashkiaku i Finiqit ka hedhur sytë drejt fushës së Vurgut, ku pjesa më e madhe e saj i përket kësaj bashkie, për të bërë të mundur rikthimin e lavdisë së dikurshme bujqësore.

Për këtë, ai po kërkon dhe ndihëm e ekspertizës fqinje, asaj greke.

Ja ç’thuhet për këtë në një njoftim të Bashkisë Finiq:

“Kryetari i Bashkisë Finiq, Z. Kristo Kiço, së fundmi pati një diskutim të gjatë dhe shumëdimensional me profesorin e shquar Athanassios E. Natsis, ku në prani të drejtuesve të Drejtorisë së Bujqësisë të Bashkisë,  shqyrtuan mundësitë e përcaktimit të bazave shkencore në zhvillimin e sipërmarrjes në sektorin e bujqësisë.

Profesori dhe shkrimtari  i njohur A. Natsis theksoi nevojën e programimit të  një politike efektive mbi shfrytëzimin e përshtatshëm të tokës së fushës së Vurgut në dobi të zhvillimit, por edhe mbrojtjen e mjedisit duke futur metoda efektive të kultivimit dhe udhëzime shkencore në  aktivitetet  bujqësore  të Bashkisë.

Kryetari i Bashkisë, Z. Kristo Kiço, i sugjeroi profesorit që ata së bashku të organizojnë sa më parë një konferencë shkencore me pjesëmarrjen e ekspertëve të fushës ku do të dëgjohen dhe propozime të tjera në mënyrë që të hartohet një politikë afatgjatë në fushën e zhvillimit bujqësor të zonës, e cila  ofron njëkohësisht mundësi të mëdha punësimi.

Profesori i dhuroi Kryetarit të Bashkisë dy libra të tij, rezultat i studimeve afatgjata të titulluara ‘Zgjedhja optimale e materialit informatik’ dhe ‘Difektet e traktorëve bujqësorë-organizimi dhe parashikimi’ të bashkëfirmosura dhe  nga Giannis Kallimanis.

Nga momenti kur u zhvillua ky takim, stafi i bashkisë po punon oër organizimin së shpejti të konferencës së propozuar shkencore”. /sarandacity.al/