Për ministren Kumbaro, njën gjirokastritë e lidhur fort me qytetin e saj, me aksin Kardhiq – Delvinë, qyteti i gurtë bëhet dhe më det.
Këtë ajo e tha së fundi pikërisht në Gjirokastër, duke shpjeguar zhvillimin që sipas saj po merr jugu. Shpjegimet e saj qenë në kuadër të informimit mbi mënyrën e aplikimit thirrjen e IV të programit IPARD II.
“Nuk mjafton, jo vetëm për të zhvilluar atë që e kemi quajtur degën më të rëndësishme të zhvillimit të ekonomisë në dhjetëvjeçarin në të cilin kemi hyrë, pasi potenciali është shumë më i madh nëse duam të shtrijmë hartën e turizmit, zhvillimit të ekonomisë, investimeve, të të ardhurave, etj.
Kemi një sinergji, dhe një hartë të re. Njerëzit nuk vijnë më në Gjirokastër vetëm për kalanë, por shkojnë në Përmet, Tepelenë, ndalen në Këlcyrë, shkojnë deri në Nivicë, për të zbuluar bujtinat e reja, falë edhe rrugëve që tashmë po shtrihen nga Çarshova deri në Përmet nga Tepelena në Kuç.
Janë të gjitha investime që shkojnë drejt turizmit.
Restaurimet e trashëgimisë kulturore, programet e rilindjes urbane, ndryshimi i konceptit të agroturizmit dhe investimet janë të gjitha në fakt shina paralele që çojnë në të njëjtin drejtim.
Qarku i Gjirokastrës është si të thuash një Shqipëri e vogël, sepse janë të gjitha, zonat e mbrojtura, lumenjtë, bujqësia, dijebërja e përpunimit të produkteve bujqësore e blegtorale, industritë, etj. Na mungonte deti, tani detin e kemi afruar edhe me tunelin e Skërficës dhe rrugën që na çon drejt Himarës dhe Vlorës”, tha ministrja Kumbaro. /sarandacity.al/
