Një shtetase 45-vjeçare u ndalua në Kakavijë, me drejtim Athinën, pasi iu gjetën nëj sasi e madhe eurosh të padeklaruara.
Banuese në Lezhë dhe rezidente në Athinë, ajo udhëtonte si pasagjere në autobusin e linjës nga qyteti i saj drejt kryeqytetit grek.
“Gjatë kontrollit të ushtruar nga shërbimet e Policisë Kufitare, në bashkëpunim me Frontex-in dhe shërbimet doganore, në çantën e 45-vjeçares janë gjetur 20.950 euro, të cilat kjo shtetase nuk i kishte deklaruar.
Shuma e parave u sekuestrua në cilësinë e provës materiale” njofton policia, duke shtuar se ajo “u procedua penalisht shtetasja, për veprat penale ‘Mosdeklarimi i të hollave dhe sendeve me vlerë në kufi’ dhe ‘Pastrim i produkteve të veprës penale ose veprimtarisë kriminale’”.
Kujtojmë se ky është i disati rast muajt e fundit që pikërisht në Kakavijë kapen sasi të mëdha eurosh në posedim të padeklaruara. /sarandacity.al/
